تامر حسني يوافق على التعاقد مع شقيقه.. لماذا رفضه في البداية؟
كتب - محمد اسماعيل
وأكد حسني أن تعاونه الأول مع شقيقه جاء بعد عدة سنوات من الرفض، موضحا سبب الرفض، من خلال نشره صورة تجمعه بشقيقه الأكبر، وعلق عليها عبر حسابه بموقع إنستجرام، قائلا: "الصورة دي والفرحة اللي في ضحكة حسام أخويا لازم اكلمكوا عنها.. دا حسام أخويا الكبير كان نفسه يدخل عالم الإنتاج الفني من ٥ سنين وينتجلي وأنا الحقيقة كنت دايماً برفض وكان بيزعل مني، بس كنت دايماً بشرحله إنه لازم يدرس السوق الأول وميعتمدش عليا ويفهم ويذاكر كتير أوي مش عشان ينتج لاااااا عشان يكون منتج شاطر".
وأضاف المطرب الملقب بنجم الجيل: "فعلا عمل كدا واستوعب كلامي وبدأ يتفرج ويتابع كل اللي بيحصل من أول فيلم اهواك وتصبح على خير لحد ما شارك بجزء بسيط في إنتاج فيلم (البدلة) وأشرف على إنتاج ألبومي (عيش بشوقك) وانتوا أكيد شايفين العملين طلعوا ازاي للناس وازاي نجحوا والحمد لله كل عمل فيهم في السنة دي حقق نجاح كبير جداً".
وتابع: "أنا في الصورة دي كنت قاعد بمضي عقد أول فيلم إنتاجه وكان بيقولي (طلعت عيني عشان القعده دي) وأنا كنت بقوله إوعى تزعل مني أنا كنت بعلمك تكون قد المسؤولية لوحدك، ودلوقتي بأمانة أنت قدها وأنا اللي فخور إنك بتنتج لي عشان شايفك بجد شخص بقى شاطر جداً ومجتهد وبتفكر صح وشركتك دلوقتي فيها أقوى الأفراد من كل الجوانب وأنا فخور بيهم كلهم فعلاً، ألف مبروك يا حبيبي يا أخويا الكبير ياللي ياما علمتني حاجات جميلة وأنا صغير النهاردة بردهالك من قلبي وبدعيلك ربنا يكرمك ويكرمنا جميعاً ويكرم كل مجتهد وتكمل مشوارك وتنتج ليا ولغيري".
هذا وينتظر تامر حسني عرض فيلمه الجديد "الفلوس"، الذي يشاركه في بطولته كل من زينة، خالد الصاوي، عائشة بن أحمد، نانسى صلاح، محمد سلام، تأليف محمد عبد المعطي، ومن إخراج اللبناني سعيد الماروق.