أحمد السعدني يوجه رسالة للمتطاولين على عبد الرحمن أبو زهرة
وجه الفنان أحمد السعدني رسالة شديدة اللهجة إلى المتطاولين على الفنان القدير عبد الرحمن أبو زهرة، بعدما شنت ممثلتان هجوما لاذعا عليه، وسرد السعدني موقفا مشابها مع ما جرى بين أبو زهرة والممثلتين اللتين شنتا عليه الهجوما، موضحا أن الهدف من الموقف ليس الإهانة وإنما التعلم.
وأخذ السعدني يروي، قائلا: "أول فيلم أعمله في حياتي هو فيلم يوم الكرامة إخراج أستاذ علي عبدالخالق كنت طالب في المعهد و كان عندي امتحان ٩ الصبح في الهرم وتصوير ٢ الظهر في بورسعيد، قلبت الامتحان في ساعة وقلت عشان أنجز آخد القطر لبورسعيد ركبت القطر ١١ ونمت وأنا نايم كنت بحلم إن القطر كل شوية يقف وناس تنزل وناس تركب صحيت حسيت إني نمت كتير إزاي كده و الطريق ساعتين تقريباً ببص في الساعة لقيتها ٤ العصر ولقيت الإنتاج مكلمني ٣٤ مرة ولقيت القطر واقف يحمل قمة الازبهلال، وفتحة بقي اللي مخليا الست اللي قاعدة جنبي شافت زوري تقريباً".
وتابع أحمد السعدني: "الست اللي جنبي قالتلي مالك في إيه قلتلها إحنا فين قالتلي في القصاصين ما علينا إني معرفتش إحنا فين برضو قلتلها مش احنا رايحين بورسعيد قالتلي آه بس ده قشاش بيقف في كذا محطة أعمل إيه كلمتهم قلتلهم سمعوني من المنقي خيار المهم على ما وصلت وجهزت الساعة كانت ٦ دخلت وشي في الأرض والأستاذ بيشرح المشهد كنت ميت من الجوع أكيد مكلتش من الصبح كان في إيدي سندوتش بضربه في الخباثة علي قدر الامكان و في لحظة وأنا بستطعم الجبنة السايحة سمعت الاستاذ بيقول بريك يا جماعه عشان الاستاذ احمد بياكل بصيت علي احمد عز لقيته مبياكلش عرفت ان انا المقصود".
وأضاف السعدني: "اللقمة وقفت في زوري ياسر جلال هبدني واحدة على ضهري بتوجعني لحد دلوقتي بس سلكت اللقمة قلت بصوت متحشرج لا يا استاذ انا خلصت الحمدلله قال اطفوا النور وقعدهم كلهم وقالي كمل السندوتش كملته وانت بطفحه طبعاً كأني ببلع زلط وأثناء ده استاذ علي اللي هو حبيب ابويا مسكني غسيل ومكوة من اللي قلبك ميحبهمش و بعد ما خلصت قالي خش يا حبيبي اغسل سنانك و ايدك دخلت الحمام قعدت اعيط زي العيال بشحتفه و محمد رياض و ياسر قعدوا يرزعوا عالباب بره عشان افتح مبفتحش الاستاذ علي مسك المايك وقال اطلع عايز أصور طلعت و عملت أحسن مشهد ليا في الفيلم تقريباً ده اذا كان ليا مشهد حلو اصلاً".
وأنهى السعدني حديثه قائلا: "بعدها الأستاذ خدني علي جنب و قالي انت محتاج تنشف و تتعلم أصول الشغلانة يعني الاستاذ كان بيعلمني وأنا اتعلمت مكنش بيقهرني الرسالة دي لكل واحد سولت ليه نفسه يغلط في الاستاذ الكبير عبد الرحمن ابو زهره الهي تنحشر اللقمه في زوركوا يا قللات الادب و التربية".