أنا ماشبعتش منك.. رسالة مؤثرة من نجل طارق الدسوقي بعد إصابته بكورونا
حرص نجل طارق الدسوقي، ويدعى أحمد، على توجيه رسالة مؤثرة إلى والده بعد إصابته بفيروس كورونا.
وقال نجل طارق الدسوقي على فيس بوك: "حطيت الصورة ووقفت كتير مش عارف أقول ايه.. في حاجات كتير أوي في قلبي مش عارف أترجمها في كلام.. أنا عارف اني مش ببين احساسي في أوقات كتير ومش بعرف اتكلم، بس انا نفسي اقولك دلوقتي قد ايه انا بحبك وقد ايه انا فخور بيك وب اني ابنك".
وتابع: "من زمان اوي لما كنت بتجيلي المدرسة وتحضر المسرحيات اللي بعملها كنت ببقى مرعوب اوي مش من الناس ولا من العرض كنت مرعوب اني معجبكش وحتى لما كبرت بخاف امثل قدامك بس عارف ليه لأن مهما الناس قالتلي حلو وبرافو مش بيفرق معايا غير رأيك انت انا باخد ثقتي في نفسي منك وباخد قوتي منك لو الناس كلها شافتني كويس وانت لا عمري ما هشوف نفسي كويس ولما الناس بتقولي انا شبهك بقولهم لأ لأني ببقى نفس اكون شبهك ومش عارف يا ريت حتى اجي نصفك".
وأضاف: "أنا عارف أنك هتقوم عشان أنت أقوى رجل أنا شفته في حياتي، هتقوم عشان تنصحني وتقعد تتخانق معايا على طريقة أكلي ونومي، أنت فاكر إني زهقت من نصايحك؟ والله عمري ما أزهق من كلامك وعمري ما أزهق من خوفك عليا".
وأكمل: "قوم يا بابا عشان أنت بتوحشني وأنا قاعد معاك، ما بالك وأنت تعبان ومش عارف أبقي جانبك، قوم يا بابا عشان أعملك كل اللي نفسك فيه وأخليك فخور بيا".
وأنهى حديثه قائلا: "أنا ماشبعتش منك وعمري ما أشبع منك، بابا مش بس وجودك بيطمني أنا اسمي عشان بعد اسمك لوحده بيطمني، قوم عشان انت ضهري، بحبك قوي يا بابا، بحبك يا أحسن أب ورجل في الدنيا دي كلها".
