بعد اعتراف القاتل.. زوجة المهندس أحمد عاطف: ملحقتش أشبع منك يا قلبي

وجهت دعاء عبدالعزيز، زوجة المهندس أحمد عاطف، رسالة مؤثرة له عقب اعتراف صديقه بقتله، ودفعه من أعلى كوبري جامعة المنصورة.

وقالت الزوجة في منشورها: "يا قلبي الظالم اعترف وعقبال التنفيذ بالاعدام، انت اللي كنت بتدافع عنه وبتحاول تصلح بينهم، وبتسعي تجيب عياله عشان يشوفهم، وهو حرمك من عيالك، وحرم عيالك منك، خلاهم يتامي وكنان عنده سنتين وسليم ٨ ايام، واتولد ولا انت شوفته ولا شافك ي قلبي".

وأضافت: "مصعبتش عليه وانا بسأله عليك ي احمد وبعيط وبقوله مرجعش من وقت م كان معاك، مصعبش عليه كنان وهو بيكلمك وبيقولك تعالي ي بابا، مصعبش عليه وانت بتاخد منه فلوس الولاده عشان نروح للولاده تاني يوم".

وتابعت: "خلاني #ارمله_الشهيد_احمد_عاطف، خلاني ارمله بعد ٣ سنين جواز بس ي قلبي، ٣ سنين ملحقتش اشبع منك ولا حنيتك ولا ولادك لحقوا يشبعوا منك ي قلبي، ودعتني بمكالمه قبل ما يغدر بيك الخاين وتفارق، بس مكنتش كافيه للوداع ي قلبي، كانت دقيقه ونص بس كأنك كنت حاسس يا قلبي، وبتقولي هتوحشوني لما تروحي للولاده".

واستكملت: "شفت لما كنت بقولك دا كداب متصدقوش، شفت لما كنت اقولك ملوش امان، انت اللي كنت طيب ي حبيبي، اااااااااه حاسه اني قلبي ارتاح شويه، انا لسه جايه من عندك من المقابر وارتاحت لما اتكلمت معاك وزورتك، جيت سمعت الخبر ارتاحت اكتر، والله ي قلبي عارفه أن عملك الطيب هيقعدلك، وعارفه أن ربنا مش هيضيع حقك، لانك عمرك ما زعلت حد ولا جيت ع حد طول عمرك بتخاف ربنا".