منه فضالي تتعرض لعملية نصب من مخرج عراقي

أعلنت الفنانة منة فضالي من خلال بث مباشر عبر صفحتها الشخصية على موقع التواصل الشهير "فيس بوك" تعرضها للنصب والإهانة من المخرج العراقي صفاء الدين.

وقالت إنها رشحت لفيلم من خلال شركة بالمهندسين وسيتم عرضه عبر منصة "شاهد"، وأبدت إعجابها بالفيلم وحسن المعاملة من مخرج الفيلم في بداية التعامل، وزعم المخرج وجود منتج من الخارج، وعندما ذهبت للتصوير تفاجأت بعكس ما قاله المخرج لها.

وأضافت: "رحت أصور الفيلم وكان ذوق ومحترم جدا، وقال لي معايا منتج من بره مصر، ويوم التصوير لقيت كل الكاست اتغير ومافيش غير الفنان مجدي كامل، وتفاجأت إن كل شوية الناس بتطلب فلوسها فيتقال ليهم مفيش فلوس، في ناس بتقول مش محتاجة فلوس والكلام اللي أنا مش هرد عليهم، لأن أنا دخلي الوحيد الشغلانة دي".

وتابعت: "فيه ناس كتيرة معايا تعرضوا للإهانات والبلطجة واتغير المنتج الفني، وطلب مني يجيلي البيت وجالي مع منتج اسمه حاتم، وبصراحة كنت أول مرة أشوفه وأتعامل معاه، وقالولي معلش هنستأنف التصوير مرة أخرى، وخلوني اعتذرت عن عمل جديد في لبنان علشان أكمل الفيلم ده".

وأكملت: "مخرج العمل استغنى عن جميع أبطاله، وأجّر أحد البلطجية للتصدي لكل من يطالب بأجره"، متابعة: اللي بييجي يطلب فلوسه بيضربه.. جايب له بلطجي وبيحبسه في الأوضة، وباعت للمنتج الفني الجديد تهديدات وأي حد هيطلب منه فلوسه، إحنا مُعرضين للهجوم على بيوتنا في أي وقت، حتى بتاع البوفيه ليه 2800 جنيه.. راح طلبهم وحبسوه في أوضة والبلطجي دخل ضربه، وأنا قدمت شكوى لنقابة المهن التمثيلية".

وقالت: “حبيت أطرح الموضوع عليكوا، لأن في ناس من أصدقائي مخدوعين في المخرج، النقابة أخدت الإجراءات ووقفوا الفيلم”.