نجوم الفن يتصدون للهجوم على صلاح
وقف نجوم الفن سدا منيعا أمام كل محاولات الهجوم على نجم نادي ليفربول الإنجليزي والمنتخب المصري، محمد صلاح، عقب خسارة نادي ليفربول أمام ريال مدريد الإسباني بنهائي أبطال أوروبا.
البداية مع محمد هنيدي الذي تكفل بالدفاع عن صلاح، في منشور قال فيه: "عارف لما بتبقى بتلعب بلاعب في البلاي ستشين وفجأة تلاقيك بتنافسه أو اللاعب بعد ما اعتزل بيحلل أداءك في التلفزيون وبيوصفك بالأفضل في منطقتك في العالم".
ومضى هنيدي، قائلا: "عشان كدة بقى عايز أقول حاجة، بقالي فترة بشوف» بعض الشباب اللي بيحاول يسخر أو يقلل من صلاح، يمكن يكونوا مابيحبوش صلاح أو بيشجعوا فرق منافسه، من حقك ماتحبش صلاح وحقك تحب فريق منافس وتشجعه".
ويضيف هنيدي: "بس الفكرة ليه تقلل أو تكره واحد قدر يعمل اللي ملايين كانوا بيشوفوه مستحيل؟ صلاح اللي كان بيسافر بالقطار كل يوم وينام في النادي ع الأرض وبدون واسطة قدر يصنع نفسه من الصفر، لغاية لما وصل أنه بقى ينافس على الأفضل في العالم، صلاح زينا وشبهنا، ماتولدش في بقه معلقه دهب، قدر يكون مثال لأي واحد بيتعب وشايف أن حلمه وهدفه مستحيل يتحقق، صلاح مثال لأي شخص مجتهد وبيمر بظروف صعبة وحياة صعبة، مثال أنك تقدر مش بس تكون الأفضل في بلدك، تكون الأفضل في العالم، الفكرة مش في الشخص، الفكرة في الفكرة نفسها، أن يكون عندنا شخص وأشخاص طبعا في مجالات كتير تانيه زيه، قدروا يحققوا اللي انت واحنا كنا شايفينه مستحيل.. فالحب والتقدير لصلاح.. مش حب لشخص ..حب لفكرة ونجاح، وهاردلك يا صلاح".
ونشر الفنان آسر ياسين صورة له رفقة محمد صلاح، بتعليق قال فيه: "الملك المصري.. حظ صعب"، بينما سخر الشاعر الغنائي أمير طعيمة من هتاف بعض أنصار ومحبي فريق ريال مدريد الإسباني في مصر، ضد صلاح، بقوله: "مكنتش عارف ان مصر فيها أسبان كتير كده".
أما الممثل محمد أنور، فوجه رسالة لمهاجمي، بقوله: "بدل ماتفرحو بفوز ريال مدريد وتفرحو بخساره محمد صلاح، افرحو أن فيه واحد مصري على سقف طموحنا وخلانا زعلانين أنه خسر نهائي دوري ابطال اوروبا في الوقت اللي لما كان واحد مصري بيحترف في الدوري السلوفاكي كنا بنفرح، واحد مصري بقي أهم وأفضل لاعب في الدوري الانجليزي في آخر ٥ سنين ومن أفضل ٥ لاعبين في كوكب الأرض والناس في العالم كله بتغنيله وبتهتف باسمه واسم مصر".
وتابع: "واحد مصري خلي شباب كتير اوي يتمسك بالامل ويشوف أن مفيش حاجه مستحيلة، حنا زعلنا النهارده على صلاح هو زعلنا على نفسنا بالظبط لاننا كنا عاوزين سقف طموحه وطموحنا يعلى أكتر من كده ويبقي ملوش حدود، ازعلو على كل سنة بتضيع من عمر صلاح في الملاعب من غير ما يحقق كل حاجة لأننا من بعده ما حدش هيعيشنا اللحظات دي تاني وهنرجع نتفرج على الناس دي في البلاي ستيشن بس".
ونشر المطرب محمد شاهين صورة صلاح، بتعليق قال فيه: "دا نجم كبير دا اسطورة مصرية كبيرة.. اي شخص عقيم يشمت فيه انا عاذرك لسة عنده كتير اوي هيقدمه ولسة الخير هيكون اكتر بكتير يارب يحفظك يابو مكة ويكرمك في اللي جاي كله ويبعد عنك الناس الحقودة العقيمة".