الجارحي: التواجد في الأهلي شرف كبير لأي لاعب

وجه مودي الجارحي قائد الفريق الأول لكرة السلة بالنادي الأهلي رسالة للجمهور بشأن تجديدات عقود اللاعبين أو رحيل البعض بشكل أو بآخر عن صفوف القلعة الحمراء خلال الفترة الحالية.

مودى الجارحي

وكتب الجارحي عبر حسابه الشخصي على موقع التواصل الاجتماعي فيس بوك: "مفيش لاعب بيضحي عشان خاطر النادي الاهلي، عدد محدود اللي بيضحي بجد وأنا عارفهم وبالاسم في كل الألعاب، الكل بيستفاد من وجوده في النادي الأهلي  وجود أي لاعب في النادي الأهلي دا شرف كبير أوي".

شعبية الأهلي

وأضاف: "قبل النادي الأهلي اللاعب مفيش اتنين عارفينوا في الشارع بعد النادي الأهلي مصر كلها عارفاك لمجرد ارتباط اسمك باسم النادي الأهلي والأمثلة كتير اوي، إنك ترحل او تتفاوض علي الفلوس دا حقك طبعا كل واحد بيشوف مصلحته ولكن إحنا كجمهور النادي الاهلي علينا عامل كبير أوي في الكلام دا عشان احنا بنكبر أي حد وبنحسس اي حد انه فوق النادي وبنضغط على الإدارة ومعرفش علي أساس ايه بنعمل كده".

وواصل: "اللاعب دا بياخد عقد قدامه بيتمرن وبيلعب ومطلوب منه يكسب أي بطولة بيلعبها او يعمل اللي عليه والتوفيق دا بتاع ربنا، لا إحنا كجمهور بعد أي ماتش ننزل ٥٠ بوست للاعب نشكره ونحسسه أنه خيره علي النادي وانوا كان بيلعب لوحده فا طبيعي اللاعب وهو بيجدد هيتشرط علي النادي ولما يجي النادي الأهلي يقولوا دا اخرنا في الفلوس ودا الصح طبعا فاللاعب يمشي فالجمهور بيكون عنده صدمة لا إحنا النادي الأهلي والنادي الأهلي مش بيوقف على حد في أي لعبة".

جمهور الأهلي

وقال: "وأنا بتكلم دلوقتي بلسان واحد من جمهور الاهلي وبالمناسبة أي لاعب يقولك أنا مضيت علي بياض بيكون الكلام دا أي كلام بيكون عارف كويس أوي عقده ايه ودا حقه طبعا ولكن ميقولش بضحي وفي لاعب تاني مش بيمضي غير وكل حاجة مكتوبة في العقد ودا حقه هو كمان بس ميقولش بضحي والمشكلة إن التمثيل والضحك علي الجمهور هو دا الماشي اليومين دول ولكن هيجي اليوم اللي هيبان مين بيمثل ومين بيحب النادي بجد".

واختتم قائلا: "على فكرة في ناس زي ما قولت في أول كلامي بتضحي عشان النادي وفي كل الألعاب موجودين الناس دي اللي تستاهل الشكر والتقدير على حبها وغيرتها على النادي الأهلي وآخر حاجة عايز أقولها وجود أي لاعب في النادي الأهلي في أي لعبة دا شرف بيحلم بيه ملايين غيرك "النادي الأهلي فوق الجميع".