عمر طاهر ينصف محمد فؤاد: جرىء أكتر من منافسه الأشهر

أثنى الكاتب عمر طاهر على المشوار الفني للمطرب محمد فؤاد، وذلك بمناسبة إتمام الأخير الستين من العمر. 

وقال عمر طاهر: "بمناسبة وصول محمد فؤاد لسن ٦٠ أعتقد دي مناسبة لزملائنا نقاد المزيكا الشاطرين إنهم ينصفوا تجربة فؤاد وهي فعلا متعبية كلام وأفكار".

ومضى الكاتب، يقول، في مشور عبر حسابه بموقع فيسبوك: "سيب آخر كام عمل و هاته من الأول هتلاقيه في منطقته كان مغامر ومجدد وجرىء أكتر من منافسه الأشهر"، وأضاف: "هو أول اللي اشتغلوا مع عصام عبدالله. ياسر عبد الرحمن. فهد. مدحت الخولي. أحمد منيب. مودي الإمام. هو اللي قدم وليد سعد محمد رحيم مصطفى عوض عزيز الشافعي تامر عاشور".

وأكمل طاهر: "الوحيد في جيله اللي كانت انطلاقة نجاحه من غير حميد الشاعري اشتغل معاه بعدين. الوحيد في جيله اللي  خاض تجربة جريئة ألبوم كامل مع احمد الحجار. إزاي صوته وهو بيقول يا ليل بقى فاصل اذاعة الاغاني المصرية هو و ماحدش غيره من جيله. مواضيع أغانيه ماوقفتش في حتة واحدة .. فيلمين مع مخرج كبير زي خيري بشارة و فيلم غير خريطة السينما مع هنيدي .. طلع من الفلكلور غنا و قدم تترات بقت تفصيلة في اسماع الناس.. طبيعة نظرة الناس ليه و شكل الحتة اللي سكنوه فيها".

وتابع عمر طاهر: "تجربة مليانة كلام و كتابة و حاجات يتقدر تعبه فيها و حاجات فكت منه طبعا زي أي حد. بس إجمالا تجربة تستحق التقدير و تستحق انها تتحط في مكانها بالضبط و إن حد ينتشلها من منطقة اللطافة و القلش و كام عمل مش قد كدة مايلغوش اللي الراجل أنجزه بالفعل. كل سنة و انت طيب يا فؤش".