عمر طاهر يحسم جدل أغنية محمد منير.. و"يوتيوب" يحذفها

أبدى الكاتب عمر طاهر، رأيه في الدفاع عن الفنان أكرم حسني بعد الاتهامات الموجهة إليه باقتباس كلمات وألحان أغنيته الجديدة "للي" للمطرب محمد منير.

واستهل عمر طاهر حديثه، بقوله: "بوستات الدفاع عن أكرم حسني في موضوع غنوة منير فيه شقين.. الأول بيدافع عن موهبة أكرم وده أنا معاه قلبا وقالبا ومفيهوش كلام والتاني بيجيب حكم إعدام للي بيهاجموا أكرم وبيقولوا فيه حاجات ملطوشة في كلمات الغنوة ورص الناس دي في ليستة الحاسدين والحاقدين والمرضى النفسيين".

ومضى عمر طاهر، يقول: "وأنا اسف بس ده حكم سطحي عاطفي بيتجاهل أزمة في الشغلانة بكل تفريعاتها.. فيه حد وهب عمره لكتابة الشعر دي قضيته ودي شغلانته اللي بيستهلك فيها عمره ومجهوده علشان يتطور ويبقى جدير بالفرصة اللي يستاهلها.. شخص تعبان على عمل وضع لنفسه بالطرق الطبيعية إنه يشتغل ويتطور ويقدم نفسه في انتظار اللي بيفهم وفي ايده الفرص يقول له عايز اشتغل معاك".

وتابع عمر طاهر: "ف لما يلاقي حد كتابة غنوة لمطرب كبير مش مشروعه الرئيسي هو اللي بياخد الفرصة دي فمن حقه يحبط ويلوش..  شخص محبط بيدور على الثغرة اللي خد منها حد تاني الفرصة ف بيجيبها في سطر مسروق في لحن مسروق في أي حاجة تقول إنه هو شخصيا ماقصرش.. بيحاول بينه وبين نفسه يواسي نفسه على فرصة كان مستنيها وحد خدها بطريقة أسهل من اللي اشتغل عليها بكتير".

وأضاف عمر طاهر: "ده وضع محبط جدا ومؤذٍ جدا واللي فيه يستاهل الطبطبة والمعلشة واحترام إحباطه مش تقعده على كرسي كهربا وتكمل عليه.. الدفاع عن أكرم فيه حاجات كتيره توصل الرسالة من غير ما تدوس على حد.. ينفع تقول إن أكرم بيكتب أغاني برامجه الناجحة بقاله أكتر من 10 سنين وينفع تقول إن أكرم نموذج لشخص شقي على اللي بيحبه وماحققش مكانته بالصدفة لكن تدوس على ناس بتفرفر علشان اكتشفت إن عمرها ضاع أونطة ومصدومة إن الفرصة مش مستاهلة كل الشقا اللي بيشقوه بجدية ف دي حاجة بخلاف إنها مؤذية فهي كمان مش في صالح أكرم لو أنت مهتم بالدفاع عنه".

وأنهى عمر طاهر، حديثه، قائلا: "بالمناسبة ده إحباط في قصة اللي خد فيها الفرصة كان قدها... قيس على ده في بقية فروع شغلانة الفن احباط  قصص فيها ناس خدت الفرصة وهي مالهاش في الموضوع بجنيه".

وفي أول تفاعل رسمي مع الاتهامات الموجهة لأكرم حسني، استجابت إدارة موقع اليوتيوب لشكوى رسمية قدمها الملحن محمود المنسي واتهم فيها أكرم بالسطو على لحن أغنيته "ولد الهلالية" التي قدمها منير سابقا، وتم حذف كليب الأغنية الجديدة.