محمود المنسي يعتذر لأكرم حسني ومحمد منير على اتهامهما بسرقة لحن أغنيته

اعتذر الفنان الشاب محمود المنسي، للفنان أكرم حسني بسبب سوء التفاهم الذي جرى مؤخرًا بينهما بسبب أغنية "للي"، واتهامه له باقتباس لحن الأغنية التي غناها الفنان محمد منير، من أغنيته "ولد الهلالية" التي نشرها المنسي عام 2017.

وشارك المنسي، مقطع فيديو له عبر حسابه على "فيس بوك"،  قال فيه: "ازيكم، بالنسبة للجدل اللي أثير الأيام اللي فاتت بخصوص تشابه لحن أغنية “للي” مع أغنيتي ولد الهلالية ومطالبتي بحقوقي الأدبية، فأنا حابب أوضح أكتر من نقطة، أنا لما نزلت أغنية "لِلي" وسمعتها، لاحظت على طول إن لحنها يكاد يكون متطابقًا مع لحن أغنيتي، فأنا كفنان غيرت على شغلي وتعبي وعملت فيديو أطالب فيه الناس إن هي تحكم، وعملت خطوات نحفظ فيها حقوقنا وقدمنا شكوى على فيديو الشركة المنتجة واتقفل".

وأضاف: "من بعدها الشركة المنتجة تواصلوا معنا، وقعدت مع الفنان أكرم حسني، وبصراحة الراجل استقبلني في بيته، وأحسن ضيافتى، وكان في منتهى منتهى الأدب والذوق والاحترام، بس ما وصلناش لحل، وبعدها أخويا وصديقي الفنان أمير محروس، تواصل معايا وحاول يقرب وجهات النظر، وأنا بشكره جدًا من كل قلبي على مجهوده لحد ما رجعت لنفسي، وحطيت النوتين جنب بعض، لقيت فيهم تشابه كبير لكن مش تطابق".

وأوضح: "وهنا أدركت أنى أسأت تقديري للموقف تمامًا، وزى ما أنا قولت قبل كدا وأن الفلكلور ملك للجميع في التصرف فيه، فا أنا استخدمت الفلكلور بتصرف وهو استخدمه بتصرف، والنتاج الأخير إن الأغنيتين مش شبه بعض".

وتابع: "وبالنسبة للاتهامات اللي بتقول إن أنا سارق من الفولكلور فأنا واخد بيت واحد بس من الفولكلور، وبنيت عليه أغنية أربع دقائق من إبداع المؤلف والملحن تقدروا تسمعوهم، وعندنا أمثلة كتير من الموضوع ده، واتعملت في أغاني كتير أنتم بتحبوها زي على حسب وداد لعبد الحليم حافظ، زي أغنية خطوة يا صاحب الخطوة من ألحان عزيز الشافعي وأغاني تاني كتير جدًا".

وأكد على انزعاجه من عناوين السوشيال ميديا التي قالت إنه يتهم أكرم حسني بالسرقة، قائلا: "وكمان ضايقني عناوين السوشيال ميديا اللي بتقول إن أنا بتهم أكرم حسني بالسرقة، وده محصلش إطلاقا في أي تصريح مني، ولو الكلام تحور ووصل لك بالشكل ده، فحقك عليا أنت أخ كبير وفنان مبدع، وكلام زي ده ولا يأثر إطلاقًا في حد بتقلك، فكان لازم أطلع تاني وأوضح سوء التقدير وأعترف بغلطي".

وتابع: "أخيرًا أنا قفلت الموضوع ده تمامًا ومش هتكلم فيه تاني، وحابب أبارك لفريق عمل "لِلى" أبدعتوا بصراحة، ومبروك للكينج وجمهوره، على طول فى حتة تانية".