انتصار: أنا فنانة كوميدية متزنة وعندي شوية نكد بيطلعوا في البيت
قالت الفنانة انتصار إنها تفضل تصنيفها كممثلة كوميدية بالأساس لان الكثيرين لا يعرفون ماذا يعني الممثل الكوميديي.
وتابعت خلال لقائها ببرنامج "كلمة أخيرة" الذي تقدمه الإعلامية لميس الحديدي على شاشة ON: الناس فاكرة إن الكوميدي بس بيضحك الناس وبيقول إفيهات على المسرح، رغم أن الممثل المصنف ككوميدي دوره مهم جداً مثل عبد المنعم مدبولي وسهيرالباروني وسهير البابلي وعبد المنعم مدبولي.
أكملت: الممثل الكوميدي يعني أنه خلص كل شيء في التمثيل وبقى عنده موهبة كمان يضحك الناس ودي صفة وتخصص مش موجود كتير في العالم.
ورداً على سؤال الاعلامية لميس الحديدي: بس إنتِ في ساعات بتخرجي من الكوميدي زي واحد صفر وذات، لترد قائلة: أنا ممثلة متزنة ومالية مركزي بروح اضحك وبعدين ارجع اكمل تمثيل.
واصلت: الممثل الكوميدي نكدي أوي ويعجبك في النكد وفي نفس الوقت يسخر من أحزانه ويضحك عليها.
وقاطعتها الحديدي أنتي في الحياة العادية نكدية؟ لترد: أيوه عندي حتة نكدية كده موجودة بس مش قدام الناس في البيت بس لكن بمجرد خروجي من البيت هتلاقي الضحك كله.
ورداً على سؤال الحديدي امتى بتطلعي الحتة النكدي: لما بكون مزنوقة وعندي مواعيد تصوير وغيره بالاضافة لالتزامات البيت فأنا هنا بلعب دور الام والمثلة والمسرح ومديرة أعمال نفسي وبروح أدفع مصروفات المدرسة وأحضر اجتماعات أولياء الامور في البيت وبروح السوق.
استطردت: نكدي بيطلع لما بلاقي المواعيد دخلت في بعضيها تصوير وشغل مع مواعيد المدرسة والمذاكرة صحيح الولاد كبروا بس في ساعات بيبقوا مش عاوزين يصحوا للمدرسة أو يقفلوا التليفون أو مخلصين الواي فاي في البيت وغيرها أو مش عاوزين يروحوا التمرين.