انتصار: "مش فاضية للزواج.. الراجل بيشفط الوقت"

قالت الفنانة انتصار إنه في حياتها الزوجية وبعد إنجابها لأولادها لم تقرر الزواج مرة أخرى لعدم وجود وقت، تابعت خلال لقائها ببرنامج "كلمة أخيرة" مع لميس الحديدي: “ماعتزلتش الرجالة لكن مافيش وقت أما أكون ست عاملة وأم في البيت خاصة أني ست عاملة في مجال صعب وفيه تنافس بيشفط الوقت والعمر لأني مش مجرد موظفة بس بروح الصبح أمضي وأرجع".

واصلت: “24 ساعة شغالة حتى وأنا في البيت على طول في وضع تنافسي طول الوقت حتى في البيت بنتابع لإثقال المهارات وغيرها”.

وردًا على سؤال الحديدي: “هل الرجل بيشفط الوقت؟” لترد: “كل الوقت ومش حكاية تجربة شخصية فقط لأن الست بتتحول بعد الزواج لأم الرجل وعاوز في البيت يبقى الابن الكبير بعد ولاده وبالتالي الست بتتفاجيء أن بقى عندها زوج زي ابنها الكبير عاوز اللي يأكله ويشربه ويسمع همومه ولازم الست تكون طول الوقت كده".

وأوضحت أن لديها إحساس أمومة عالي مثل أي سيدة أنجبت ولكن في ذات الوقت العمل في مجال الفن صعب لأنه مع مرور الوقت سوف تكتشف المرأة أنه لا وقت لديها حتى أن تكون أم لنفسها.

ولفتت إلى أن أسباب طلاقها تعود لخلافات عادية قائلة: “الوفاق من عند ربنا محدش ضامن نفسه لأن الوفاق والود زي السر بين الاثنين فجأة بعد الهدوء ممكن ينتهي الوفاق.. الزواج مكتوب والطلاق برضه مكتوب بمواعيد”.  

وعن أهم الصفات التي لا يمكن أن تقبلها في أي رجل قالت: “البخل أولاً ثم الكذب والخيانة والبخل في المرتبة الأولى لأنه ليس بخل مال فقط بل أيضًا مشاعر.. لما أتجوز راجل بخيل هديله مشاعر إزاي؟ وأنا مش مستخسرة فيه حاجة”.

ورداً على سؤال الحديدي: “بعد كل السنوات دي مافيش أي راجل؟” لترد قائلة: “المهنة بتاعتنا صعبة جدًا بس للأسف الظاهر أمام الناس أتفه ما فيها”.