عارفة عبد الرسول: ماحسيتش بطفولتي وأول فرصة تمثيل انتهت ببيع التذاكر

قالت الفنانة عارفه عبد الرسول إنها من مواليد حي الإبراهيمية بالإسكندرية لكني اتربيت في حي الحضرة ، وبابا سماني عارفه على اسم جدتي وكنت مش بحب الاسم ، وكانوا بيندهولى في العائلة بميرفت ، واكتشفت بعد كده إن الاسم حلو .

وأضافت خلال لقائها مع الإعلامي دكتور عمرو الليثي ببرنامجه واحد من الناس على شاشة الحياة ، أعمامي ٧ وأبويا أصغر واحد فيهم وفتح محل بقال ، وكان بيوقفني في المحل مكانه لأنه كان شاب وذواق بيروح للسينما ويسيبنى في المحل وأنا في سن ٣ سنوات ، ولم أعيش طفولتي ، وأول مرة أركب ملاهي في حياتي كان في مسلسل اللعبة .

وتابعت إن والدها كان بيديها في الأسبوع ٢٥ قرشا ، وكنت بحوشهم واشتريت بيهم حاجات ليا ، وبابا تعب من البقالة فقولت ليه نغير يا بابا نعمل محل كوافير فقال لي مش شغلانتنا ، فقولت ليه اتعلمها وفعلا روحت اشتغلت في كوافير سنة بدون مقابل ، واشتغلت مع الفنان وحيد سيف كان بيعمل مسرحية في الإسكندرية ، وكان في فنانة اسمها ولاء عندها تصوير فيلم ، وقالوا لي اعملى الدور مكانها ، ورجعت تاني بعد تأجيل الفيلم فالأستاذ وحيد سيف قالي خلاص بضحكتك الحلوة دى تقعدى على شباك التذاكر وفعلا قعدت أبيع تذاكر.