رشا مهدي عن أبو زهرة: "مسلمتش من لسانه وهحكي اللي حصل"
دافعت الفنانة رشا مهدي عن الفنان القدير عبد الرحمن أبو زهرة، بعدما شنت ممثلتان هجوما لاذعا عليه، وسردت موقفا طريفا جرى بينها وبينه في كواليس تصوير مسلسل "أستاذ ورئيس قسم" مع الزعيم عادل إمام.
وأخذت رشا مهدي تروي، قائلة: "بمناسبة الكلام عن علاقة عمنا الاستاذ عبدالرحمن أبو زهرة بالممثلات و النجمات في اللوكيشن و ان محدش "سلم من لسانه".. انا اشتغلت مع الاستاذ كذا عمل آخرهم مسلسل أستاذ و رئيس قسم مع الزعيم و مشفتش من استاذ عبدالرحمن غير كل خير طبعا، بس آخر عمل ده بصراحة "مسلمتش من لسانه" و هحكي ايه اللي حصل..".
وتابعت مهدي: "أول يوم تصوير شفته وكنا من سنين متقابلناش فسلمت عليه و قام ربنا يديله الصحة و سلم عليا بس كان بسرعة أوي ورجع قعد تاني! بصراحه اتفاجئت و خفت يكون زعلان مني فبعد ما سلمت عالناس رجعتله و قعدت جمبه و فضل ساكت فقلقت اكتر وقلتله حضرتك فاكرني؟ فمن غير ما يبصلي قالي آه فاكرك!".
وأضافت رشا مهدي: "بصراحة استغربت اكتر من طريقة المعامله و فضل ساكت فقلتله طب فاكر اشتغلنا ايه مع بعض؟ قالي آه و سكت برضو! بصراحة الموضوع استفزني اكتر فقلتله طب انا اسمي ايه؟ وهنا انفجر فيا وقالي بصوت عالي "رشا مهدي فاكرك يابنتي والله فاكرك واشتغلنا كذا و كذا و كذا ولو انتي بقى فاكره كنت بقول سيبوني اركز قبل التصوير عشان اعرف اشتغل وانتي كمان قومي زاكري و نبقى نتساير بعد الشغل يا بنتي".
واستطردت رشا مهدي، قائلة: "انا طبعا مقدرتش امسك نفسي و ضحكت وهوا بيزعق و اللوكيشن كله ضحك وهوا حبيبي ممسكش نفسه و ضحك و طبطب عليا وقالي يابنتي كنت مركز متزعليش مني و قعد يسأل على ماما و اخواتي و عليا ويقولي رأيه في شغلي و بعدها قمنا نحضر".
وأردفت مهدى: "فجأه الزعيم راح للأستاذ عبدالرحمن وهوا مركز تاني وقرب منه وقاله بصوت عالي "انت فاكرني"؟ طبعا مش محتاجه اكمل افيه انت فاكرني ده كان عامل ايه في اللوكيشن طول التصوير. عمنا عبدالرحمن حضرتك نجم و فنان و أب من الزمن الجميل ربنا يديك الصحة طول عمرك قامة و قيمة ومبتبخلش على حد بخبرتك و فنك".